Quelle: Bürgerverein Anrath e.V. | www.buergerverein-anrath.de | Stand: 10. Jul. 2013

So worde wier jruet

(von Gertrud Stadtfeld - aus dem Heimatbuch 1987)

Öt morjes öm 6, dann stung Mamma op,
leep hejer on jönder, Trepp aff on Trepp op.
Moß os all wecke, denn wir schleepe faß,
wee net treck spurde, dem meek se jett naß.
Flott dat Kaffeewater op, et ös all jau laat,
die Pann möt Bronepel op die hengerschte Plaat.
Möttonger joefe et och Haferflocke,
töscheduer moß Mamma noch eene de Koße stoppe;
on Papa sinne Knibbel moß en de Täsch,
jett Melk mött Kathreiners en de Kaffefläsch.
Öm 1/2 8 woer dann alles fott,
dann dronk Mamma noch eene Schluck ut de Kaffeepott.
Dann meek se de Stuef on de Kaamere blank,
donoe sott se sech buete op de Bank:
se schälde de Epel on schrabde die Muhre,
on hat kenne Tiet för sech self de beduhre.
Wenn die öm 12 dann na Hus all koeme,
woer Mamma noch die Bloetwusch am broene.
Wer haden er Eene, de ding 3 moel schöppe,
do moeß Mamma emmer rette dat Muhredöppe.
Naem Eete moße er 2 dann spoele,
on we sech dann taakde on fong an de jroele,
de dorfte or noch Stuef on Husjank utkehre,
on en de Tummel moeß Mamma wier Bottramme schmere.
Die leit se dann bej siehe op de Kaas,
jedeer sin Höppke, alles na Maaß.
Öm 4 Uhr woer de Scholl uet, on all hade se Honger,
bej Muhre mött Flöns, datt woer jo ken Wonger.
Hat ose Tönn die Husarbeit jemäk,
word de enn der Stall gescheckt.
Do moeß dä de Kanin fuere on de Kusch,
he meek allerhands Feetz, dat woer enne Lusch.
Enns sott de 3 Kanin de Kusch op de Röck,
do sollde die rie, mar de Kusch meek net mött.
Ose Franz koes ens sinne Klomp nett mier fenge,
de Tönn woer de de Kusch an der Steez am benge.
Ja die Boersch driefen et mött onger jett ärg,
on Mamma stunge de Hoore de Berg.
Öm 7 Oves koehm Papa na Hues,
dann woert et langsam stöller ent Hues.
Et joef dann enne Teller Bottermelksprenk,
de schmeek os so joet, wie hüet en Bottram mött Schenk.
Wir kennde kenn Fernsehn, kenn Radio noch Bi-et,
on woere doch defrien, gesonk on och fit.